<p>ሀገራዊ የልማት አጋርነቱን በተለያዩ ጊዜያት በማስመስከር የሚታወቀው የመከላከያ ኮንስትራክሽን ኢንተርፕራይዝ፤ የኢትዮጵያ ኤሌክትሪክ አገልግሎት የሐረሪ ሪጅን ዋና ጽህፈት ቤት ሕንፃ ግንባታ በይፋ ጀምሯል።&nbsp;<br>በግንባታ ማስጀመሪያው መርሃ ግብር ላይ የተገኙት የመከላከያ ኮንስትራክሽን ኢንተርፕራይዝ ዋና ሥራ አስፈጻሚ ብርጋዲየር ጄኔራል ኢንጂነር ሰጠኝ ሊኪሳ፤ ኢንተርፕራይዙ በርካታ ሀገራዊ ፕሮጀክቶችን በጥራትና በሰዓቱ የማጠናቀቅ የቆየ ልምድ ያለው ተቋም መሆኑን ገልጸዋል።&nbsp;<br>አሁን ላይ በይፋ የተጀመረውን የኢትዮጵያ ኤሌክትሪክ አገልግሎት ሕንፃ ግንባታም በተያዘለት የጊዜ ገደብና የጥራት ደረጃ ለማጠናቀቅ አስፈላጊውን የሰው ኃይልና ማሽነሪ ዝግጅት አድርጎ ወደ ሥራ መግባቱን አረጋግጠው፣ ግንባታው በተያዘለት ጊዜ በጥራት ተጠናቆ እንደሚረከብ ተናግረዋል።&nbsp;<br>የኢትዮጵያ ኤሌክትሪክ አገልግሎት ዋና ሥራ አስፈፃሚ ተወካይ ወይዘሮ ለምለም ምስጋናው በበኩላቸው፣ ግንባታው በመከላከያ ኮንስትራክሽን እንዲከናወን መደረጉን ጠቅሰር አዲሱ የሪጅኑ ዋና ጽህፈት ቤት ህንፃ በተያዘለት የጊዜ ገደብ እንደሚጠናቀቅ ሙሉ እምነት እንዳላቸው ገልጸዋል።&nbsp;<br>የሕንፃ ግንባታው ሲጠናቀቅ ለህብረተሰቡ የሚሰጠውን የኃይል አቅርቦትና የመሰረተ ልማት አገልግሎት ቀልጣፋና ዘመናዊ ለማድረግ ትልቅ አስተዋጽኦ እንደሚኖረውም አክለዋል።&nbsp;<br>የሐረሪ ክልል ኤሌክትሪክ አገልግሎት ኃላፊ አቶ ኻሊድ ጣሀ በበኩላቸው፣ የግንባታው ሥራ በተያዘለት ጊዜና የጥራት ደረጃ ተጠናቆ ለአገልግሎት እንዲበቃ አስፈላጊው ክትትልና ድጋፍ እንደሚደረግ ገልጸዋል።<br>በክልሉ የሚገነባው ይህ የተቋሙ ባለ አስር ወለል ህንፃ ለግንባታው ሁለት ቢሊዮን ብር በላይ የተመደበለት ሲሆን፣ በቀጣዮቹ 900 ቀናት ውስጥ ይጠናቀቃል ተብሎ ይጠበቃል።</p>