<p>የመከላከያ ኮንስትራክሽን ኢንተርፕራይዝ የፌዴራል ማረሚያ ቤት ኮሚሽን በአዲስ አበባ ከተማ የሚያስገነባውን የፋሲሊቲ ሆስፒታል ቀሪ ሥራዎች ከ 1.7 ቢሊዮን ብር በላይ በሆነ ወጪ ለማጠናቀቅ የሚያስችለውን የውል ስምምነት ዛሬ ተፈራርሟል።<br><br>በፊርማ ሥነ-ሥርዓቱ ላይ የፌዴራል ማረሚያ ቤት ኮሚሽን ኮሚሽነር ጄኔራል የኑስ ሙሉ እና የኢንተርፕራይዙ ዋና ሥራ አስፈጻሚ ብ/ጄኔራል ኢንጂነር ሰጠኝ ሊኪሳ ውሉን በጋራ ፈርመዋል።<br><br>ኮሚሽነር ጄኔራል የኑስ ሙሉ፤ "የሆስፒታሉ ግንባታ ከ14 ዓመታት በላይ በመዘግየቱ፣ አሁን ከመከላከያ ኮንስትራክሽን ጋር የተደረገው ስምምነት ግንባታውን በአጭር ጊዜ አጠናቆ ለታራሚዎችና ለአካባቢው ማኅበረሰብ አገልግሎት ለመስጠት ትልቅ ዕድል ይፈጥራል።"<br><br>ብ/ጄኔራል ኢንጂነር ሰጠኝ ሊኪሳ፦ "ኢንተርፕራይዙ በግዙፍ መሠረተ ልማቶች ላይ ያለውን ሰፊ ልምድ በመጠቀም፣ ይህን ሆስፒታል በተቀመጠለት የጊዜ ገደብና በላቀ ጥራት አጠናቆ ለማስረከብ ቁርጠኛ ነው።"<br><br>በግንባታው የሚከናወኑ ዋና ዋና ሥራዎች፡-<br>•&nbsp; የቀሪ የሲቪል ሥራዎች ማጠናቀቂያ<br>•&nbsp; ሙሉ የኤሌክትሪክ መስመር ዝርጋታ<br>•&nbsp; የፍሳሽ እና የቆሻሻ ውሃ ማጣሪያ (Treatment) እና የሳይት ወርክ ሥራዎች ናቸው፡፡<br><br>ይህ ግዙፍ ፕሮጀክት ተጠናቆ ለአገልግሎት ሲበቃ ለታራሚዎችም ሆነ ለጠቅላላው ማኅበረሰብ ጥራት ያለው የጤና አገልግሎት ተደራሽ ለማድረግ የሚደረገውን ሀገራዊ ጥረት በእጅጉ የሚያግዝ ይሆናል።&nbsp;&nbsp;<br><br>&nbsp;በፊርማ ሥነ-ሥርዓቱ ማጠቃለያ ላይ የሁለቱ ተቋማት ከፍተኛ አመራሮች እና አማካሪ ድርጅቶች የሆስፒታሉን የግንባታ ደረጃ በመስክ ምልከታ ጎብኝተዋል።</p>